奥斯卡提名2019《星梦情深》气势如虹！入围最佳电影、影帝影后8大提名！

　　第91届奥斯卡金像奖2019 候选最佳电影大热之一《星梦情深》（A Star Is Born / 台译《一个巨星的诞生》）气势如虹，获奥斯卡金像奖8项提名，包括最佳电影、最佳男主角（影帝）、最佳女主角（影后）、最佳男配角及最佳原创歌曲、最佳混音、入围最佳改编剧本和最佳摄影。《星梦情深》由乐坛巨星Lady Gaga以及演《醉爆伴郎团》同《冒牌伴郎生擒姊妹团》等喜剧起家的 Bradley Cooper担演男女主角，呢套音乐电影喺上画时相当瞩目，特别系Lady Gaga可谓锋头十足，甚至最初惹人误会电影系Lady Gaga嘅自传，咁到底本身呢套戏有咩特别，可以入围咁多提名呢？

　　入围最佳改编剧本：《星梦情深》第三度改编经典杰作

　　《星梦情深》电影故事蓝本系根据源自1937年一套同名电影《A Star Is Born》而改编。呢个老掉牙嘅故事讲述两个热爱音乐嘅创作人如何惺惺相惜，再走过人生嘅高低峰。人气高踞嘅摇滚巨星Jack（由Bradley Cooper饰演），意外邂逅平凡女生Ally（由Lady Gaga饰演），被佢嘅音乐才华同魅力深深吸引。之后Jack更邀请Ally参与自己嘅巡回音乐表演，一齐同台演出，双方打得火热发展成情侣。虽然才华洋溢嘅Jack系有酗酒问题，酒后经常为Ally带来唔少麻烦，甚至赔上自己事业，但Ally都决意同佢结婚。渐渐Ally得到唱片公司赏识，签约单飞出道踏上自己嘅音乐路，而佢嘅星途亦如日方中，但同时气势大不如前嘅Jack亦开始成为佢嘅负累。不过即使到最后，Ally都无选择放弃Jack，但Jack为咗唔想再拖累Ally，决定作出扼腕嘅决定......

　　《星梦情深》入围最佳电影 有迹可寻！

　　在此之前，《星梦情深》其实已经有另外两个改编版本，前作都屡度喺奥斯卡颁奖台上大放异彩：1937原作喺奥斯卡上获七项提名（夺得最佳原创故事）、1954年嘅作品获奥斯卡六项提名、1976年嘅作品获四项提名（夺得最佳歌曲）。因此接下来电影喺今年奥斯卡获八项提名可谓意料之内，当中包括「最佳电影」 、「最佳男／女演员」 、「最佳歌曲」等。

　　《星梦情深》男主角、女主角人选风波

　　早喺2002年，就已经传出电影公司有第三度改编呢套电影的打算。唯独男女主角方面，人选多番反复，男主角曾经传由Will Smith甚至Tom Cruise演出，而女主角其实一直属意由Beyoncé担纲，可惜周旋多年仍无结果，最后Lady Gaga同呢个角色一拍即合，电影先得以顺利开拍，Lady Gaga更有成为影后。至于导演人选亦有多番变动，最后敲定由男主角Bradley Cooper首度自导自演，挑战都真系几大！

　　Lady Gaga成奥斯卡影后大热 经典一幕令人难以忘怀

　　就算冇入场，都会从trailer知道电影入面两位主角喺台上高唱一曲《Shallow》定情嘅片段，但其实除咗呢幕，Lady Gaga喺最后一幕情深唱出《I'll Never Love Again》怀缅悼念亡夫的一幕，同样令观众留下难忘印象，甚至睇到泪崩，据知Gaga之所以流露咁真挚的情感，全因拍摄前佢得知好朋友因癌症恶化而过身。

　　可惜在刚过去的第76届金球奖颁奖典礼上，Lady Gaga不敌《The Wife》女星Glenn Close，与金球奖影后无缘，但她仍可缘寄望 2 月底的奥斯卡影后！

　　入围最佳原创歌曲 《星梦情深》音乐会非做戏 都是现场收音！

　　故事深情动人之外，电影亦创作咗唔少琅琅上口，风靡全球嘅流行大热金曲，包括入围「最佳歌曲」嘅《Shallow》。电影歌曲亦展现咗多元化嘅曲风，包括country以至电子舞曲，全赖一班音乐精英携手创作，而Bradley Cooper同Lady Gaga都有音乐创作团队核心，真挚演绎歌曲中嘅神髓。为求真实，电影内部分音乐会嘅片段仲系喺2017年美国大型音乐节Coachella中现场拍摄，全是现场收音而不是预先在录音室录好再对嘴的成果！

　　严谨监督音乐创作 金球奖上先夺声威！

　　所以在金球奖颁奖典礼上，《星梦情深》凭《 Shallow 》一曲勇夺最佳电影歌曲奖，实属意料之内，Lady Gaga更为了此歌前后改动了 18 次，是100%心机之作，众望所归。