相隔六年！人气美剧《花边教主 Gossip Girl》翻拍在望！？

　　仲记唔记得曾经风靡一时嘅超人气美剧《花边教主 Gossip Girl》？小编相信应该系唔少人嘅中小学回忆，可惜嘅系《花边教主》自从2011年播出第6季之后就宣布停拍，令好多粉丝失望，但估唔到六年后竟然传出《花边教主》翻拍在望嘅消息，小编要尖叫啦！

　　系咪好挂住《花边教主》嘅男神S，女神S，同各对CP值极高嘅萤幕情侣呢？当然唔少得每集开头嘅神秘旁白啦XOXO Gossip Girl（即刻有声有画面），有冇人同小编一样细个都成日扮先！

　　翻拍嘅消息传得火热，CW电视网主席Mark Pedowitz都证实话：翻拍消息确实有讨论过，但未清楚未来方向，所以到现今都未有共识，一切都要睇华纳兄弟娱乐公司同埋制作人 Steph 同Josh嘅意愿！

　　虽然翻拍消息到目前为止都算模糊，但根据Mark嘅讲法都绝对唔系无可能！再加上各主角对于翻拍嘅消息都十分正面，睇嚟2019年翻拍在望㖞！

　　饰演女主角Serena嘅Blake Lively表示：唔好对任何嘢Say No，因为你永远都唔会知有咩会发生！而同样饰演女主角Blair嘅Leighton Meester就话：如果时间啱而且大家都最希望翻拍成真嘅话绝对有可能！

　　虽然《花边教主》停拍6年，但系《花边教主》嘅演员班底呢6年就愈演愈热！首先系Blake Lively下嫁饰演死侍嘅Ryan Reynolds，更加接拍多部当红荷里活电影并担正做女主角，例如《时光逆爱90年》、《绝鲨岛》同埋上年上映嘅《小心帮忙》。

　　饰演男主角Dan嘅Penn Badgley同样唔输蚀，佢正正就系Netflix热播剧集《安眠书店YOU》嘅男主角，剧集自播出之后都被网民热烈讨论。而家《安眠书店》咁红，如果《花边教主》真系翻拍嘅话，唔知Penn会唔会唔够时间两面兼顾而要二选一呢。