奥斯卡电影2019率先预告今年看点！超英大战黑白片 大热影后Lady Gaga献声

　　今届奥斯卡颁奖礼是非多多，临阵闹出主持辞任、大会想话于广告时段颁奖…事事都惹负评，不过其实今年都好有话题性，除咗唔似早年有白化问题，仲可能因为《黑豹》同《罗马》而创出影史新纪录，又有超强表演嘉宾，一齐睇吓有咩必睇位！

　　第一部超英最佳电影诞生？

　　今年奥斯卡焦点之一就系漫威话题超英片《黑豹》入围争最佳电影。

　　有几劲？佢系影史上第一部争最佳电影嘅超英片，以往咁多年来，超英片多数入围技术奖，最叻猪都只系已故小丑希夫烈格态《蝙蝠侠-黑夜之神》拎过最佳男配角奖。平时被视为大众娱乐商业味浓嘅超英片首次咁威，如果获奖就再创纪录喇！

　　串流平台Netflix踏出第一步

　　以往大家要去戏院先有得睇戏，但近年出现嘅串流平台就玩转呢个情况，Netflix更系当中表表者，自家制作嘅电影仅限线上平台播映。

　　近年呢啲电影于电影节同颁奖礼争奖就惹出争议，不过一片争议声中，Netflix今年就凭名导Alfonso Cuaron嘅口碑黑白片《罗马》入围奥斯卡争10奖，仲成为佢哋创立以来第一部争最佳电影嘅出品。

　　如果得奖的话，相信会成为影坛热话！

　　黑人电影人可望大丰收？

　　早几年奥斯卡成日因为大多数白人电影工作者入围争奖而惹负评，于网络上仲出现#OscarSoWhite嘅Hashtag，不过今年情况就唔同晒，事关种族色彩浓厚嘅《黑豹》同《缘簿旅友》狂扫提名。

　　Spike Lee执导30几年更终于有份入围争奥斯卡最佳导演奖，相信黑人电影工作者于颁奖礼嘅收获都会几瞩目！

　　Gaga献声Bradley Cooper处男演出

　　Lady Gaga处女担正电影《星梦情深》就入围争影后的确系焦点，但佢同男主角Bradley Cooper将于现场唱Hit爆嘅最佳原创歌曲入围作《Shallow》都系不容错过嘅场面。

　　佢哋於戏外就仅仅于Gaga演唱会唱过，但今次仲系男方第一次于奥斯卡大舞台唱歌，就连佢自己都话好紧张！

　　冇主持巨量红星顶上变集绵骚

　　今年奥斯卡本身由著名谐星Kevin Hart主持，但佢被翻出早年有恐同言论，怕影响颁奖礼焦点而临时辞任，大会连月揾唔到主持，最后决定弃用主持，成为史上第二次冇主持嘅奥斯卡。

　　第一次系1989年由众星间场，今次亦系揾咗大班各界名人红星顶上，当中包括漫威复仇者联盟嘅超级英雄...

　　同体育界嘅Serena Williams，亚洲代表仲有杨紫琼会现身！

　　Adam Lambert + Queen打头阵唱爆颁奖礼

　　大会冇主持人，一向由主持讲足20分钟嘅开场一幕今年就改由英国殿堂级乐队Queen打头阵演出。

　　近年顶上乐队已故主音Freddie Mercury，随乐队演出嘅Adam Lambert都有上阵。

　　相信会听到好多《波希米亚狂想曲：摇滚传说》出现过经典名曲，准备好We Will Rock You未？