Marvel补底班！5分钟KO超级英雄基础知识

　　讲起超级英雄，身边好多姊妹嘅评价都净系得美国队长好靓仔、Iron Man好有型，或者雷神啲肌肉好正！除咗啲表面嘢，对于Marvel嘅来龙去脉就一知半解得半桶水，甚至连有咩超级英雄都唔清楚！不过唔使惊，小编决定同大家嚟个补底班，用5分钟速读Marvel电影加人物，唔再做无知港女！

　　Marvel无超人！Marvel无超人！Marvel无超人！（好重要所以要重复3次！）Marvel同DC其实系两间唔同嘅美国漫画公司。大部分上映嘅超级英雄电影都系根据Marvel同DC嘅漫画改编而成，所以千祈唔好以为所有Superheroes都系嚟自Marvel。

　　Marvel创造人物包括：复仇者联盟（美国队长、Ironman、雷神、黑寡妇、变形侠医、鹰眼、奇异博士、黑豹、蚁侠、蜘蛛侠、死侍等等...），神奇四侠，X-men （狼人、妖后、雷射眼、暴风女郎、凤凰女等等...），以及银河守护队等等。

　　DC创造人物包括：蝙蝠侠、超人、神奇女侠、蝙蝠女、绿灯侠、闪电侠、水行侠，同自杀特攻（小丑+小丑女...）等等。

　　Marvel 电影有几多部？

　　到目前为止总共有18部，分咗3个阶段，3个阶段电影入面嘅Superheroes到最尾都一同合力寻找同夺回无限宝石（Infinity Stones）。因为如果6粒宝石都同样落入最强奸角Thanos手上嘅话，佢将会获得强大力量，地球将会面临危机！

　　第一阶段电影：《铁甲奇侠》、《变形侠医》、《铁甲奇侠2》、《雷神》、《美国队长》、《复仇者联盟》

　　第二阶段电影：《铁甲奇侠3》、《雷神2》、《美国队长2》、《银河守护队》、《复仇者联盟2》

　　第三阶段电影：《蚁侠》、《美国队长3》、《奇异博士》、《银河守护队2》、《蜘蛛侠：强势回归》、《雷神3》、《黑豹》

　　Marvel + DC：是朋友又是对手

　　呢两间漫画公司嘅关系可以话系是敌是友。其实各自嘅漫画人物都会偶尔出现喺另一间公司嘅漫画入面。好似蝙蝠侠同变形侠医乱战，喺Marvel世界入面，蝙蝠侠被打到不似人形，而喺DC世界入面，蝙蝠凭著自己出色嘅谋略，打到绿巨人跪地投降。

　　亦都有唔少演员同时演过Marvel同DC嘅角色，最为人熟悉应该就系莱恩·雷诺斯（Ryan Reynolds），佢分别饰演过绿灯侠同死侍。

　　Marvel电影马拉松排序：

　　然后其中一个经常问嘅问题就系：究竟点样睇Marvel电影先会啱时序？等小编话你知啦，咁今个weekend就可以嚟个Marvel电影马拉松！

　　《美国队长》－> 《铁甲奇侠》－> 《变形侠医》－> 《铁甲奇侠2》－> 《雷神》－> －> 《复仇者联盟》－> 《铁甲奇侠3》－> 《雷神2》－> 《美国队长2》－> 《银河守护队》－> 《银河守护队2》－> 《复仇者联盟2》－> 《蚁侠》－> 《美国队长3》－> 《黑豹》－> 《奇异博士》－> 《蜘蛛侠：强势回归》－> 《雷神3》－> 《蚁侠与黄蜂女》－> 《复仇者联盟3》－> 《Marvel队长》－> 《复仇者联盟4》－> 《蜘蛛侠》－> 《银河守护队3》－> 《黑豹》