白色情人节礼物想拒绝对方可以回礼话佢知？

　　情人节收咗礼物，想起白色情人节回礼究竟有咩要注意？正常嚟讲，喺2月14日情人节当日，如果你收咗男仔送嘅朱古力（或其他礼物），咁你就要喺一个月后嘅3月14日白色情人节回礼；不过回礼亦唔代表一定应承嘅，因为每款礼物都有不同含意。就算你你想婉转地拒绝对方，其实都可以喺白色情人节嘅回礼礼物入手！

　　回礼一：糖或朱古力

　　喺日本文化里面，如果女生接受你嘅示爱，就会将糖或朱古力当作回礼，表示接受。如果送薄荷糖俾对方，即系话佢好想同佢拍拖！

　　回礼二：曲奇或饼干

　　曲奇代表温柔体贴，如果以曲奇作回礼，即系对对方释出善意。如果以饼干作回礼，唔甜又唔苦，又唔系心心形状嘅话......就系代表Friendzone，所以如果想婉转地拒绝对方，送饼干都系一个唔错嘅选择！

　　回礼三：棉花糖

　　如果喺白色情人节送或者收到棉花糖又代表咩呢？根据传统，棉花糖容易溶化，代表爱意转眼消逝，意思即系拒绝人咁解呀！

　　不过讲多无谓，今时今日要得悉一个答复，又使乜等一个月咁耐。计我话，如果你情人节收咗礼物但又对对方无兴趣嘅话，应该之后都唔会见（收兵例外）！讲真如果真系有意思又点会想等一个月先话佢知呀！不过，如果你系浪漫派又想搞搞新意思，白色情人节回礼对大部份人嚟讲都应该几新颖嘅！